لى حد وين !؟..

[محمد برقاوى]

لى حد وين !؟..
***
كلمات/ محمد عبد اله برقاوي..
****
لى حد وين ياهل ترى..
ومتين مشاعرك افسرا..
كل ما ادق الباب تقول ..
لسه الحكاية مبكرة..
***
ومشت خطايا على الطريق..
خايف سرابك يودرا..
وخوفي لو باكر أقيف..
في نهار صحاري محيرة..
يتجدد الجرح القديم..
الكان مع الأيام برا..
تتلاشي في لهب الهجير..
شتلة أماني مخدرة..
***
أنا ياما عا نيت الأسى..
وصوتي في الزحمة اتنسى..
ورغم المرارات والقسا..
عبراتي ظليت حابسا..
والليلة متأمل عسى..
وحشة زماني تونسا..
قلبي في دربك رسى..
روحي اشتكت ليك هاجسا..
***
جيتك علي سرج الغمام..
وبسطت ليك كف السلام..
كان ردك أجمل ابتسام..
في وداعة اطفال الفطام..
ساقنا المقال حسب المقام..
وحتى العيون قالت كلام..
حسيت تجاهك بانسجام..
زى البعرفك الف عام..
***
دولة الامارات العربية المتحدة/ العين
20/4/2004