عادة سودانية أكرهها وتضايقنى

[محمد أحمد سعيد]

ذهبت يوم الجمعة فى المشوار الاسبوعى لجلب الكسرة من بيت الكسرة ووجدت صديق قديم لم اقابلة منذ فترة أخذ كسرتة وذكر لى انو عايز كسرة بى كام لكى يقوم بدفع الحساب تضايقت جدا ورفضت وهو ترك مبلغ 3 ريالات مع ناس الكسرة كسداد لحسابى .
الشاهد لا أدرى أتضايق جدا جدا اذا وجدنى شخص فى مطعم وقام بسداد الحساب عنى . وكذلك عادة سداد حق المواصلات ودى تسبب لى ضيق مضاعف وخصوصا فى بكاسى البلد وعند الذهاب للسوق أو العودة منة
من وجة نظرى هذة العادات ليس لها علاقة بالكرم . بل احيانا تدخل صاحبها فى بند الاحراج.
لو جيت يوم مطعم ودفعت عنى الحساب وانا جيت بعد أسبوع وجدتك تاكل وماعندى الا حق وجبة تكفينى ادفع عنك ولا اسد رمق جوعى ( حاجة تحير)

[كمال دفع الله محمد]

هذا ليس كرما" ولكنها شهامة السودانيين ولا أظنها ستندثر قريبا" لأنها أصبحت شئ من واقعنا .

[مامون احمد م زين]

وهو ترك مبلغ 3 ريالات مع ناس الكسرة كسداد لحسابى

الاخ محمد أحمد سعيد
تحياتي
كسرتكم بتلاتة ريال بس ... والله بختكم ... نحنا كسرتنا بعوسوها فى البيت لكن أقل طلب كسرة فى هذه المدينة (الجبيل الصناعية) بعشرة ريال ...

قول لست الكسرة دى تجي الجبيل لمدة سنة واحدة بس وبعد داك السودان طوالي !!!

[ابوعبيدة س. بخيت]

كسرة الرياض في الدور التاني مع الانتركم ومواقف مخصصة للزبائن وخدمة التوصيل وقريباً الـ e.buy

يامأمون كسرتنا مدعومة ...........

[OMRAN SALAH]

ترك مبلغ 3 ريالات مع ناس الكسرة كسداد لحسابى .

3 ريال دى فى بلد ناس أخونا التقى النقى بتجيب ليك كيس واااحد فقط (شيطين بس):p;) ، يعنى لو عندك عزومه عاوز ليك كسرة بـــ 40 ريال :confused::rolleyes:

فعلا حركة مزعجة جداً ، أتفق مع استاذ محمد أحمد

[كمال دفع الله محمد]

يا ناس برة والله كسرتكم أرخص من كسرة ( المصدر) ـ السودان ـ يعني كسرة بجنيهين لا تملأ صحن

[طارق مضوى أحمد]

وسعيد كيفك

غايتو قصة البكاسى دى انا معاك أى يزول يعمل رايح من التانى والله العظيم انا مرة ماشى استلم فلوس من بنك البركه محوله مشيت الحصاحيصا معظم الناس الراكبين طلعوا من الذين وجب عليك الدفع دفعت باقى خمساتى الاكثر من نصف العربية على امل انو الفلوس وصلت وخيب البنك ظنى .. وحات خوتك اتسلفت حق الرجعة(1500جنيه) بالقديم وجيت راجع بجوعتى ساكت مع فول الحصاحيصا السمح داك ..

[محمد عوض الكريم عثمان]

عشان كده انا ما بحب الكسره خالث خالث...ولكن احب الكرم بصورة عــــــــــــــــــــــــــــــــــامه

[محمد عبدالرحمن عبدالله الحبر]

اعزرونى فانا اختلف معكم فى الرائ واوافقكم بنسبه 20%
اتفق معكم لاننا نبالغ فى شكل المجاملات فمثلا تخرج فلوسك وعينك ما تشوف الا النور فالكل يلوح بفلوسه لكى يدفع ثمن الطعام او المواصلات , والطلاق القسم ينتشرو مثل الوباء بينا وكل هذا مين يدفع
او لما يكون فلوسك قدر اغراضك الواحد يقيف فى الشارع يشوف نساء او بنات عايزين يسافرون يرجع لما الشارع يكون فاضى اما لو كانو رجال او شباب الواحد بعمل ناااااائم ويمكن ما يسلم حتى يحاسب الكمسارى ههههههه
وغالبا ما تحذف شى مهم من قائمه الاغراض علشان العاده السودانيه
والكل فى وجه نظره ان هذه العاده واجب لا بده منه
اما الاختلاف الذى وصفته بـ80% (طبعا الاختلاف فى الرائ)
هى لست كرم كما وصفت وانما دلاله على الكرم او جذو من شخصيه الشعب السودانى
وشى جميل نفتخر به ونحمله فوق روسنا ونحن فى الغربه عندما يمر بك مشهد كهذا ويكون معك بعض الجنسيات الاخرى تتباها به
هذه العاده منها تمبع العفه وكرامه
يعنى فى الجامعات والداخليات والواحد يزهب مع الشباب للفطور ويكون ما عندو ولا ريال ويعتمد على هذا العاده و اكاد اجزم ان لم تكن هذا العاده موجوده لصام نصف الشهر ليبغى كرامته على حساب لغمه طعام
تخريمه :_ ربنا بحبك اخى طارق مضوى مشوارك طلع الحصاحيصا يعنى لو كنت ماشى الخرطوم كنت رجعت البيت

[العاقب عبدالكافى قنات]

الحكاية شنو يا جماعة كلمة قروش نسيتوها
الكلام كلو فلوس..فلوس!!
اتفق معك بالكامل

[عبيد عبدالرحيم ودالجعلى]

ليس بالكسرة وحدها يحيا الانسان يا اخى محمد0 ولكن الجميل فى الامرانك التقيت
به اى صديقك هذا بعد فترة طويلة0 فلا بد بانه قد رجعك الى ذكريات قد خلت0 واما
الشى الثانى فهو نحنا كده وانا لا ارى شيئا فى ذلك وفى الاخر نحنا اولاد بلد0

مات قوم وما ماتت مكارهم0000000 وعاش قوم وهم فى الناس اموات

[محمد أحمد سعيد]

الاخوة الافاضل
تحية وتقدير
وشكرا لاثرائكم البوست بارائكم السديدة .
فى شوية خلط مابين انكم تكونوا تاكلوا مع بعض ويدفع واحد الحساب ومابين يجى داخل المطعم واحد ويجدكم تاكلوا وانتم 6 صبيان ويتوكح بالحساب لحالوا وجيبوا مافيهوا الا مبلغ محدد.

الحاجة الشوية عاملة لى لخبطة لية جزئية دفع الحساب دى لانمارسها فى سداد الحساب عن بعض فى كناتين الحلة او البقالات او الجزارات لية المطاعم والمواصلات ماكلو دفع.
تخريمة :
مامون
الكسرة فى الرياض ما بالرخصة دى لكن ام 5 ريال بتكفى البيت يوم الجمعة وامكن تفضل منها شوية لى يوم السبت لو عندك واحد فى العيال متمرد على الكسرة ولا جاى من السودان قريب.
طارق
دى الفنجرة ذاتها واذكر انو على ايامنا كان هنالك زميل لابن عمى فى كلية الطب زول فنجرى مرة واحدة لو صادفك فى محل بقولها ليك ازول عايز اكرمك وماعندى قروش دحين اكان شايل قروش خلنا النشرب لنا ليمون.