قصيدة في وصف الدنيا للشاعر عوكير ود الدامر

[يوسف احمد وداعه]

عكير الدامر يخاطب فى الدنيا

درقة الرغوة كم دمرت ناس ومساكن
كم زليت بعد العزة شامخ و ماكن
كم صبحت قلبا حي متلج و راكن
كم صبحت عمران زي مباني سواكن
***
الغني فيك يوسع و لي الزيادة يكابس
في اللين يخضر و قلبو طاري اليابس
بسراع تدي ضهرك و يبقى وشك عابس
و حالا ينقلب عريان بعد مو لابس
***
خيرك ما بدوم يالبهرج الغشاشة
يا مطر المنية الديمة سابقة رشاشة
كم قصرا جميل انوارو تضوي بشاشة
دمرتيهو اصبح فاقد المقشاشة
***
عمارك لي خراب و الفرحة فيك لي كربة
اسمك من الست الفانية دار الغربة
اولك المعيشة جري و تعب في هربة
و التانية الامل و التالتة دفن التربة
***
كم حطمت راجلا في مشيهو مشلق
صبحتيهو بي حبل النكد متعلق
دربك للبصاحبك بي عجل يزلق
يا صقر القبور الديمة فينا محلق
***
تعصري علي البريدك و تقربي تانسيهو
يترك طاعة الخالق يكون ناسيهو
بي توب سحرك البعمي القلب تكسيهو
يصبح محتضر في تربتو تمسيهو
***
سرورك ما بتم تابعاهو دية الفجعة
ظاهرك لينا سكر الا طعمك وجعة
كم طفشتي مرتاح قلبو مابي النجعة
روحو تشابي و انتي قطعتي خط الرجعة
***
تقابلك عروس تعشق معاني رقيصه
تملاك بالمحبة وتمشي نازله نقيصه
ما يغريك دلاله وتوب جمال بلقيسه
عاين للقبور وبعدين سماحته بتقيسه
***
شمس حسنك مخنقة مابيدوم اشراقة
يا لعبة شليل عضم اب قبيح براقة
كم لي الليهو منزل في جنان وراقة
خنتي اسيادو هجو و لجو يا الفراقة


فيك الحي يأمل و الفرح يبدالو
ترقصي ليهو يبشر يفتكر رايدالو
لي الشبال يميل ترميهو يا اللابدالو
تتني رقبتو يالخاينة و تكوسي بدالو
***
اوصيك نفسي اوصيك الحيا و ما فيها
شق ود الاحد بيت الشبر صافيها
لي متين تقنعي و نار الضلال تطفيها
تمسكي سكة الشافوها حاجة تفيه
***
زولاً شاف رقاد العبروهو مشبر
والزول البرص فى الطوب ووشو مغبر
إتأكد دة بكرة مصير غير إتكبر
إنسى الموت والمال والبنون إتبتر
***
اتغشينا في حبك لبسنا عباية
يا موية الرهاب الما ملت كباية
عجيب يا دنيا امرك الا نحنه غبايا
عاشقين الجمال في لمعة الحرباية
***
تبقالك جنينة تمتعك بي ثمارة
ترقد في امانه و تنهمك في عمارة
تسحب منك النعمة و تدق مسمارة
دي الغشاشة دي الغدارة دي العقارة
***
كم قلبت زغاريت عرسة بي نقارة
اعلنه بالحرب قبال تشن الغارة
و قبل الروح تقرقر تبقى في الغرقارة


يا سامع دبيب النملة جوف العاتمة
يا كاشف الخفايا الفي الضماير كاتمة
بي جاه سيد الرسل الكرام ابو فاطمة
لطفك بي عكير يوم الدفن و الخاتمة

_________________
((ربي لاتزرني فردا وانت خير الوارثين

(( رب اجعلنى مقيم الصلاة ومن ذريتى ربنا وتقبل دعاء ))