موقع أبناء منطقة الحلاوين

الأخ الصديق
تحياتى
طبعا أنا لمن كنت عزابى فى مطلع التسعينات وساكن مع مجموعة من العزابة فى مدنى يتراوح عددهم بين 6 و8 عزابة كنت طباخ البيت الرئيسى بدون جدال .. حتى بنات الداخلية فى الجامعة أشادن ببعض الحلل (طبعا كنا مرات بنودى ليهن حلل مدنكلة) وكنا طبعا نمشى السوق آخر النهار (عشان الخضار الرخيص) ونحضر كمية من الخضروات واللحوم
طبعا كان آخر عهدى بالطباخة قبل الزواج وبعد الزواج طبعا المدام ماقصرت .... ولكن كنت لمّن أجى اساعدها فى عمل حاجة او لمن تكون شغالة أو مريضة تطلّع لى طبيخى أى كلام مرة زائد ملح و مرة زائد توم و مرة زائد صلصة !!! الغربية دائما زائد .. كلو كلو ما سمعتها قالت لى ناقص حاجة .. أظن طبعا عشان الواحد ما يفكر يصلح حاجة لان الناقص بيتصلح لكن الزائد خلاص انتهى ..
يعنى باختصار كدا ما حصل شكّرت لى حلة ... حتى البت الصغيرة تقول لى:
This is not like what mama cooks
أصبحت اى حلة اطبخها آآكلها براى .. حتى لو فعلا زائدة (حاجات تانية حاميانى ..)
و بعد كدا طبعا خلاص بقيت ما عندى رغبة اطبخ خالص ...
لكن عليك الله خلينى أوصف ليك عمل صينية مكرونة بلحمة مفرومة ..(حسب الذكريات)
1- تحضر كيس مكرونة متوسط الحجم
2- تضع نصف معلقة زيت طعام فى حلة متوسطة الحجم (طبعا عشان المكرونة ما تلصق فى الحلة)
3- تنتظر حتى تسخن الحلة شوية ثم تضع المكرونة فى الحلة وتضيف موية فوق مستوى المكرونة وتضيف نصف معلقة ملح (ما تقول لى كتير)
4- تراقب الحلة لئلا تنتهى الموية ..تضيف موية للمكرونة عند الضرورة حتى تنضج .. يمكن معرفة النجوض بأكل حبة او حبتين
5- بعد ان تنضج المكرونة تنزل الحلة وتصفى بقية الموية ان وجدت
6- تحضرلحمة مفرومة حوالى رطل ونصف وتضع فى طوة بعد اضافة ملعقة زيت طعام
7- أضف ربع ملعقة كزبرة وربع ملعقة ملح وربع ملعقة فلفل مسحون
8-تحرك شوية ا حتى يتغير لون اللحمة ..
9- أضف ملعقة معجون طماطم
10- حرك حتى يذوب المعجون مع اللحمة المفرومة
11- أضف ملعقة معجون ثوم وحرك حتى يذوب المعجون مع اللحمة المفرومة(لازم يكون الثوم آخر حاجة اضفتها حتى لا تختفى النكهة)
12- بعد التاكد من النجوض اضف اللحمة للمكرونة وقلب جيدا
13- خلاص الصينية جاهزة كدا .. صحة وعافية

الأخ صديق
أخونا مأمون،

أعترف أني ( كيشة ) جدا في المطبخ ولا أجيد شئ فيه وذلك رغما من أني عشت عزابي لفترات مقدرة في السودان وفي الغربة ، لكن كلما هممت بعمل شئ يتدخل المعاي ويوقفوني حتى لا أخرب عليهم أمورهم ، وقد يكون ذلك الموقف منهم قائم على تجارب لي فاشلةفي المطبخ لم تغب عن ذكرياتهم. وهكذا طللت عايش ملك رغما عن أنفي، وبالمناسبة أنا متعقد جدا من مســـألة ( موت البصلة ) وما حصل في محاولاتي المحدودة جدا أن ماتت لي بصلة ، إما أن استعجل عليها قبل أن يتحقق موتها تماما أو أنتظر بعض الوقت بناءا على نصائح ذوي الخبرة فاكتشف أن النصيحة لم تكن صائبة وأن الحكاية حرقت وسودت وش الملاح ، لذلك دائما أتمسك بشعار أن لك زول حوبته ، المدام حوبتها في مطبخها وأنا في الشغل والفينا مكفينا.